تعرف على مصر واحوالها.فى مجموعة اشعار للشاعر العظيم شاعر العامية على سلامة.

[محب الله]

بسم الله الرحمن الرحيم
انهردة جيبلكم مجموعة من اشعار العامية للشاعر الكبير شاعر العامية المصرى/على سلامة.
يارب تعجبكم اشعاره وهى عبارة عن مجموعة من الاشعار التى توصف مصر سياسيا واجتماعيا واقتصاديا وشعبا وحكومتا..........الخ.
بجد هى اشعار جميلة جدا يارب تنال اعجابكم كما نالت اعجابى.
نبدا اولابـــــــــ خايف اصحى مالاقيش مصر

ساعات بقلق بالليل

يعني بالليل شوية كده

قبل الفجر

حسب الظروف كده

بعد العصر

خايف يوم أصحي

وأفتح الشباك

مالاقيش مصر



ألاقيها لمت هدومها ومشيت

لمت هدومها

علي نيلها

علي هرمها

وطفشت

وحلفت ميت يمين ماهي قاعدلنا

ماهي زهقت

تعبت

إتخنقت

أصلنا زودناها

أكننا استعمرناها

ورثناها



مصر البنوتة الحلوة

اللي زي القمر

بقت عجوزة وشايبة

وبان عليها الكبر



خايف يوم أصحي

وأفتح الشباك

مالاقيش مصر


متابع....

[محب الله]

أنا المواطن نقط


أنا المواطن نقط نقط نقط

ولا بتهان وأسكت زى زمان

أنا بصرخ وأكتب وأبعت وأتكلم

وأسمع بقى يا معلم

أنا المواطن نقط نقط نقط

رقم قومى نقط نقط نقطمحل الأقامة نقط نقط نقط

بجوار البنزينة

بصراحة حرام تعملوا فينا نقط نقط نقط

وتطلعوا نقط ونقط أهالينا

عملتوا انتخابات وكلها نقط نقط نقط

وشيلتوا وحطيتوا حاجات نقط نقط نقط

بصراحة أنا بقيت قدام مراتىحاسس انى مش نقط خالص

وأقولها نفسى أبقى نقط بجد

تقولى يا اخويا ماتحرقش دمك

محدش بينفع حد

حسك ف الدنيابكرة تبقى نقط نقط نقط ....!!!

[محب الله]

أحب العسل


احب العسل

واموت فى الكسل


ووقت الازمه اقول فى العشق


حكمه ومثل


وبس خلاص ..


اهجص الاقى ميت مليون هجاص


افكر......
هس.... ولا صوت ولا ناس


لأنى كده ثقافة وعلم


يدوب فى الفيلم فى الكراس


وراسى زى اكبر راس


مفيش احلام مفيش احساس

[محب الله]

استراحة ع الصحراوي

استراحة ع الصحراوي

الجو نار

سايق ومحدش معايا

غيري انا والذكريات

وحبه حاجات

ازازه الميه

ونظره عينيا

اللي شايفها في المرايا

بتبص لي من وقت للتاني بغباء

كأنها عارفة الحكاية

او واخده بالها من الطريق

مر السفر من غير صديق

اول شمال احود ولف

الغنوه سكتت

والشريط عمال يسف

وازاي تخف

يا ألم من غير جراحة

ادي استراحة

دماغي محتاجة الصراحة

وقلبي محتاج الحنان

اركن هنا

اشرب يا عم قهوتك

ويلا عشان

نلحق مكان قبل الغروب

واوعي الردار يسحب

ف لحظة غنوتك

معش فاضل في الطريق

ولا استراحة

[محب الله]

وأحنا لسة في إبتدائي



وإحنا لسه في إبتدائي


وسط اوراقى القديمة

اللى لسه منها باقي

شوفت صورتى بين زميلى

و احنا لسه فى إبتدائي

الوشوش كانت بسيطة

طاهرة لكن مش عبيطة

نرسم الأحلام خريطة

فى قلبها نقطة تلاقي

هو صاحبى

لما كان فى الدنيا صاحب

اما دول كانوا جيرانى

كل واحد فينا حقق

جزء من بعض الأمانى

أما دى الشاطرة البليدة

العنيدة أم الضفاير

تبقى حبى الأولانى

أد ايه حزنت عليها

لما راحت فصل تانى

ما احنا كنا تختة واحدة

فى تانية تالت

مره قلت

و هى قالت

لما مدت ايدها شالت

دمعة وقعت غصب عنى

جوه كراسة الحساب

كنا لسه صفحة بيضة فى الكتاب

الوشوش كانت بسيطة

طاهرة لكن مش عبيطة

نرسم الأحلام خريطة

فى قلبها نقطة تلاقى

واحنا لسه فى أبتدائي

[محب الله]

ناقص حته




ناقص حته

وكل ما أوزن

ألاقي لسه

ناقصلي حته

أحط حته

تقل حته

وأجيب قميص

تضيع جاكتة

وأعيش لي ساعة

يفوتني ستة

وكل ما أوزن

ألاقي ناقص

أقول بناقص

لو هي حته

أتاري لسة

ولسة تاخد

سنين وحته

وحاجات تسيبني

وحاجات تاخدني

لحاجات تخبط

في كل حته

وأقول هنفرح

ف يوم

هنفرح

ويوم مانفرح

علي الله يفضل

في القلب حته

[محب الله]

ميـــــــدان الجــيـــزة


ضيعت شوية سنين كده

بحب من بعيد لبعيد

والحكاية مقضياني

ومبسوط وراضي وسعيد

أفرح بأي حاجة

وأستني هدوم العيد

و بعدين ضيعت شوية سنين

نفسي أبقي أشطر واحد في الكيميا

مع إني مش فاهم ميدان الجيزة

والحياة رغم قسوتها

شايفها لذيذة

وضيعت شوية سنين بقي

نفسي أعدي أختبارات الكورة

في النادي الأهلي

وأشتغل في وكالة ناسا

وأبقي واحد م العلماء المهمين

و بعدين ضيعت شوية سنين

منتهي أملي كرسي فاضي

في أتوبيس تلات خمسات

عين الصيرة أم المصريين

وضيعت شوية سنين

عايز أفهم الفرق

بين النكسة والهزيمة

والأحترام وقلة القيمة

و أبقي نجم سيما

م المشهورين

وبعدين ضيعت شوية سنين

واقف عند نظرية المؤامرة

لا عارف أعيش ف الزمالك

ولا راضي أعيش ف غمرة

ومش عارف ليه

الحشيش ممنوع

مدام مصرحين بالخمرة

وياتري بقي أتجوز

واحدة بيضة ولا سمرة

ولا أسأل فيها

رجال الفتوي والدين

وضيعت شوية سنين

مركز ف السيراميك

والبيبان والشبابيك

وألوان الحيطان

وده بيج وده سن فيل

والموضة الأصفر

قشر الموزة

وضيعت شوية سنين

لا انا بحر ولا نيل

حاجة كده بعيد عنك

ملهاش عوزة

ولما بقيت كام وخمسين

لقيتني لسة

بحب من بعيد لبعيد

وبرضة مش فاهم

ميدان الجيزة

[محب الله]

أسكـــــت يــــــاض




قولي يا عبد الجواد


مش إحنا الشعب


وده مثبوت في البطاقة


ومكتوب ف شهادة الميلاد


ولا مصر خلفت ولاد غير الولاد


طيب ليه


كل ما اتكلم واستخدم حقي


يقولولي اسكت ياض


سنين ساكنين


في نفس الحتة الضيقة


نفس الهوا


ونفس الدوا


ونفس الأمراض


على فكرة


مفيش جبنة في التلاجة


ولا خيار


ولا أعياد


مفيش غير فيلم قديم


كل شوية بيتعاد

[محب الله]

مخدتش ولا أديت






لما وشي باة أصفر لمونة

مخدتش ولا أديت

ولما أترميت ف قلب الطاحونة

مخدتش ولا أديت

ولما شميت ريحة شياط

ووقعت فوق دماغي كل الحاجات

مخدتش ولا أديت ..

ولما قالولي من أيه الدم اللي ف وشك

فين روحك

حاسب قلبك بيغشك

مخدتش ولا أديت

ولما حسيت بألم ف راسي

ولقيتني ناسي ..

اسم ابني الوحيد ..

ولما شوفتك رايحة لحتة بعيد

مخدتش ولا أديت..

لحد ما لقيتني مربوط في جبس

وشاش ..

وشايف كل شيء طشاش ..

وحواليا ناس كتير معرفهاش

بيقولولي مين اللي رماك م القطر

يا صابر ....


علي سلامة

[محب الله]

اسمه ايه ده ..؟!!



بالصلاة ع النبي




احنا عندنا اسمه ايه ده




أحسن واحد يحلل مباريات




يحط التشكيل




الأساسي والبديل




ويقولك إمتى تلعب براسين حربة




وإمتى تلعب من غير راس




ولو ضميرك مش مرتاح




وعندك إحساس




بلاش تشوط ع التلات خشبات




وعندنا اسمه ايه ده




أحسن مهندس خبير




بيرمش بس للبير




يطلع غاز وبترول




وينزل دهب م الحنفيات




وعندنا اسمه ايه ده




أحسن سمكري ف التلاتين سنة




الأخيرة




تخش من مجرى العيون




على عين الصيرة




هتعرفه من مناخيره




ومن شكل العربيات




وعندنا اسمه ايه ده




مجرم قانون دولي ودستور




وإيده خفيفة أوي




في التعديلات




يشيل من هنا




ويحط هنا




جواهرجي يا ربي




مُلقاط




وعندنا اسمه ايه ده




أحسن واحد يحط الفول عالطعمية




ويعمل سندوتشات




وعندنا اسمه ايه ده




أحسن دكتور




مسالك وعظام وقلب وغرام




من نظرة عينك يعرف




كل الحاجات




ولا روشتة ولا إبرة ولا تحليل




ولا إشاعات




وعندنا اسمه ايه ده




أحسن حانوتي آثار




والله لو جاله برد




أبو الهول يموت




وتنتحر الأهرامات




وعندنا اسمه ايه ده




أحسن كاتب




وأحسن مخرج رقص




وأحسن جزار كوارع وعكاوي




وحلويات




وعندنا اسمه ايه ده




ملوش حل ف الزراعة




فواكه وحبوب وخضروات




يقول للأرض قمح




تقوله حاضر




ونخبز ونعمل بسكويت




وفينو بسمسم وبقصمات




وعندنا اسمه ايه ده




صاحب القهوة




كلنا نتيتم ونتشرد




لو بعد الشر




زي الناس ما بتموت




مات




يا أخي انا مش عارف ..




لما أحنا عندنا




اسمه ايه ده




واسمه ايه ده




أمال اسمها ايه دي




مصر ..




مبتتقدمش ليه




وتعبت ..




وزهقت ..




وداخت ..




ولفت السبع لفات




علي سلامة

[محب الله]

الغـــــم النبيــــــل





مش أنا امبارح



رحت من بيتنا في السيدة



للشغل في حلون



في سبع دقايق



لا شوفت حد زعلان



ولا حد متضايق



والورد إنسان



والنخل متعايق



والناس جميلة مؤدبة



والجو رايق



والدنيا ماشية لوحدها



ولا حد سايق



ومش انا



امبارح برضه



رجعت من الشغل في حلوان



لبيتنا في السيدة



في خمس دقايق



لا حاسس بغربة



ولا شايف غريب



وقلبي ابيض حليب



عندليب



كروان فرحان



شايل ف قلبي وف جيوبي



الفرح أشكال وألوان



وزعت ع الشوارع



والبيوت والجيران



وطلعت البيت



ضربت الجرس



فتحت مراتي وبالأحضان



والعيال كمان فرحانين



ناجحين وجايبين



الدرجات النهائية



من غير دروس خصوصية



قمنا رقصنا وغنينا



واحتفلنا واتغدينا



فضلة خيرك



سمك واستاكوزا



وجمبري م الكبير



وحلينا ب مهلبية



وشربنا الشاي كمان



وفجأة



لقيتني بردان بردان



بصيت لقيت



الشباك مفتوح



ومفيش بطانية



ومراتي جنبي وزي ما هيه



لسة بتعاني من آلام المفاصل



وده اللي حاصل



والحمد لله



على كل شيء

[محب الله]

اللهم أجعله خيــــــر



نفسي أتمطع
أنزل .. اطلع
أحلق أقرع
وأتشجع وأقلع
كل هدومي القديمة
وأرمي الحاجات اللئيمة
وأبقى حر كده
زي الطير
نفسي أضحك من قلبي
من غير ما أخاف
وأقول اللهم أجعله خير
يا أخي نفسي مرة
أغير خط السير
يعني مش زي ما روحت
لازم أرجع
نفسي أفرح بضحكتك
من غير ما أخطفها منك
أو أحسدك
أو أطمع
نفسي أبص م الشباك
براحتي
وأقول ياه
الله
يا بختي
نفسي أحس من تاني
بالجمال
يا سبحان من أبدع
نفسي يبقى لية لازمة
ف وقت الحزن .. والأزمة
تلاقيني ببني
بصلح
بغير
بحلم
يعني أنفع
نفسي ده يحصل
قبل كل شيء جوايا .. ما يعجز
أو يودع
نفسي أحب من تاني .. النهار
والعمار
يعني بأختصار
نفسي أرجع تاني
بني أدم
تفتكر ده ممكن ..؟؟؟؟
وأنا ولا بشوف .. ولا بسمع

[محب الله]

الشيطان كفر


على باب سفارة كندا

لمحت ابليس وفى ايدة استمارة

بقولة اية على فين

قلى بص ياهجرة يااعارة
كفرت ملئيش معاك سيجارة

ياراجل انا خلاص

لبقيت وسواس ولة خناس

ولة لية عيش وسط الناس
خلاص بقالى سنين عاطل

وانتى بتعرفوا تقلبة الحق باطل

وتقتلة القتيل وتسلكة القاتل

ومفيش مشاكل

خلاص انا مسافرمهاجر

ياراجل دنابقيت اوسوس بالمقلوب

ااقول للحرامى انت مش هتوب

يعنى انت هتعمل كل الذنوب لوحدك

وانا ابليس هشتغل اية
واعظ ولة كمسرى فى اتوبيس

ياراجل دة انا خلاص

زمان كنت اقعد استنى حد

ينسى يسمى وهو بياكل لقمتة

صراحة دلوقتى كل اكلكم ملوث

والواحد بيخاف على صحتة

دة مفيش ضمير اساسا علشان اموتة

ياراجل دة من كتر ملطشت معايا

مشيت مع الناس اللى بتقول كفاية

وبردة مفيش فايدة